منتديات قمبراتنا

مرحبا بك فى منتديات قمبراتنا
اذا كانت هذه زيارتك الاولى فشرفنا بتسجيل عضويتك

منتتديات قمبراتنا ,,, منتدى عام ومفتوح للجميع
نعمل على تحقيق اسمى آيات الترابط الاجتماعى ..
,,, مشاركتك تهمنا,,,

مع كل الود .... ادارة المنتدى
منتديات قمبراتنا

من أجلك وطنى الصغير ... منتدي مفتوح للجميع


    مساجلات قبقبه

    شاطر
    avatar
    نزار القمبرات

    عدد المساهمات : 3
    تاريخ التسجيل : 14/05/2010
    العمر : 29
    الموقع : السودان.الخرطوم.بحري.السامراب

    مساجلات قبقبه

    مُساهمة من طرف نزار القمبرات في الإثنين يونيو 27, 2011 4:53 am

    طالبني كثير من الإخوه بكتابة مساجلات

    مرابيع منطقة تنقيب الدهب قبقبه علي صفحات الإنترنت

    وها انا ألبي لهم زلك

    وللأسف

    لم استطيع ان اكتب اشعار الإخوه الذين دارت بيني وبينهم المساجلات

    لعدم التفويض ولكن إكتفيت بسرد مُساجلاتهم

    في شكل نقاط للتوضيح بالدارجيه السودانيه البسيطه

    وإعتزر لكم عن التقصير..

    ولكم العتبه حتي ترضو.

    مع خالص ودي وإحترامي

    ودمتم شموساً لاتغيب إلا لكي تشرق من جديد

    في فضاء المليون ميل مربع

    :::::::::::::::::

    البدايه

    0

    قبقبة

    يا الدهب النفيس الباهي لونك وغالي

    شارد فكري فوقك وديمه سارح بالي

    جيتك والعشم فوقك تتم أمالي

    ياخي أديني منك بالحجار وتسالي



    قبقبة نفسي..آزوره وليها ناوي القومه

    بي سبب الدهب عينينه جافت نومه

    يا الله الكريم ادينا بوكسي وقومه

    وآقهرنا العوارض وقبضت الحيكومة



    والبوكسي إن قبض حتماً مصيبتو مصيبة

    حلمك بنتهي وعيشتك بتبقى عصيبة

    بيصادرو الجهاز وعليك إفرضو ضريبة

    تبكي علي وتحن زي الفقدته حبيبة



    قبقبة ليها ماشي إن حتى بي كرعيه

    أجمل من إقامة وشقه في المنشية

    يالدهب المتبر ليك مني تحية

    يا الله الكريم أطنان لكيك وخلية



    مفقود السنين الليله جات أخبارو

    راجع بي جهاز الليلة عاد لي دارو

    خلاهو السفر شغلو الدهب وأخبارو

    راجع للخلاء وعدسو وكُتُر غَبْارو



    والحَلال فِضت عدمت شبابه رجاله

    بي جيب الدهب صبحت نفوسه شغاله

    سافروا قبقبة وقصدوا السيوح وجباله

    والبيت الكبير الليلة حارسو حِتاله



    تسرح بالجهاز وتمني نفسك كيلو

    تمسح في الأرض بي فد إشارة تشيلو

    وإن حظك كعب واتمادى في بهديلو

    تلعن أبو الدهب لي أبو البجي وبمشيلو



    مزعج يا آب كدر صوتك غراب إن زمه

    فالح في الحديد فوق الدهب ما نمه

    طاط ما طاط وكورك وتاني ما بهتمه

    انعل أبو صناعتك وما كذب من سمه



    والداير الدهب يقع الجهاز الجيبي

    أفضل مكتشف ياهو البيطفي لهيبي

    يا رب العباد إتمنى بيهو تنقيبي

    والقا لي خلية تزيد علي ترطيبي



    قبقبة مرة قاسية وإلا مابتتملا

    فيها دهب يحيّر لا كِمل لا قلا

    تزهج مِنها وترجع تجي وتتدلا

    زي تمر الفكي وباقة عسل عوض الله



    والعجب العجيب العيشه فيها تحيّر

    الوش بالوسخ بصبح دشن متغيّر

    أحلام المنام أحلاها تصبح نيّر

    احلم تستحمى ولي اللبستو تغيّر



    آ حليل اللحوم البي آلدمع مرشوشه

    فارقنا النعيم ومشينا دار الدوشه

    ناكُل في السخينة قرشنا لي قرقوشه

    قرقوشاً قسم يجرح حشى الحنكوشه



    فيها حقيقة مرة بقولا من جوايا

    لومك في نهارك وشمسك الشوايا

    لومك في سمومك ودا البهد قوايا

    و العدس البمحِن والبجيب لوايا



    وإن حظك سمح حتماً خليه غليده

    تفرح وتنبسط روحك تزيد تنشيده

    وإن حظك كعب ما تلقى فيها حديده

    ترجع بالزعل حمى وعدم توريده



    يا رب العباد أرزق جميع من زاره

    يركب ليلى علوي ويبني بيتو عماره

    في مسك الختام انا ود ملوك الساره

    ودالمك سراج إن قفه مابتجاره

    .........................................

    1

    هذه المرابيع رداً علي الرد الاول للشاعر جعفر حسن العطا ودالمادح

    من منطقة السويقيات

    ازكر مضمون رده في نقاط:

    ...بداء بالمدح والسلام

    ...تحدث عن الدهب والحظوظ

    ...تحدث عن المشي لي قبقبه (وقال لي مابتتمشي بي الاقدام)

    ...شكّر الجهاز اب كدر وزمه الجهاز الجيبي اكس

    وعن حزام الجيبي اكس الذي يضر بالضهر

    ...قال لي بالغته في مقارنة قبقبه بي المنشيه او إنت ماشايف المنشيه

    يابالغته فيها شويه

    ...تحدث عن عدم المال

    ...تحدث عن القرقوش والحنكوشه المزكوره

    في قصيدة قبقبه وقال الحنكوشه شن بيجيبه للقرقوش



    فكان ردي عليه

    ولى جعفر سلام اسد القصيد رُبانه

    لي غيث القوافي ومنبعه وبُستانه

    صحيت الحِرُوف إلإنفجر بُركانه

    هاجت وولّعت ردت عليك بي دانه



    تسلم ياملك شاعر قصيدك هادي

    ياك نِبراس قبيلتك وعندليبَ آٍٍلشادي

    والخلاني امدح وفيك أزيد إنشادي

    شاعر وسامي نضمك وياك ملاذ الصادي



    قبقبه فيها نضمك كُل حِروفو صحيحه

    في دهبه ولقاها وِزدنا نحنا مديحه

    السبب البخلي..آفكارنا ماها نصيحه

    في دار العبابده وفي جباله وسيحه



    قبقبه يانمر خابرين طريقه وداره

    وآول ناسه نمشلها نكتشف اسراره

    نقبنه الدهب شنينه نحنا الغاره

    كم جبنا الخلايه علينا نور وبصاره



    بي الاقدام بمشلها مابخافو مسيره

    نحنا آولاد جعل فُرّاس وطيبن سيره

    بنخوض المحاصه نفسنا بيها جديره

    وإن صحه النضم نحنا الحلبنه الطيره



    يامك كم مشينه قطعنا نحنا فيافي

    قبقبه مابعيده ونضمي ماهو خرافي

    ياما ضقنا مُره وليكه نضمي آلشافي

    زينا يا نمر إبل الخلا آلعنافي



    شكرته اب كدر والشكره تب مي فيهو

    دللتو..آلممحق وزِد مقامو وتيهو

    الدبزاوي كيفن بيهو بي تساويهو

    والجيبي..آلمعنف تنسى شُكرك ليهو



    كيفن يانمر بتعيبو تنسا آوصافو

    عالي التقنيه آلشبه المضمّر هافو

    كم جاب الخلايا وهو الدهب كرّافو

    والفي القدر مابجيبو غير مُغرافو



    ظُلّيط الضهر يامك قبل ضُقناهو

    خلي ظلِط حِزامو انحنا ماخُفناهو

    في الداره بْنصقِر وسوطه ماعُفناهو

    نعرِض وننجلد حاشانا ماخُفناهو



    والمنشيه شُفتها بيا هي التتشرّف

    العِذ مالمباني ولالظليل الورّف

    حبي..نا للبلد حاشاهو مابتحرّف

    آهوى القمبرات من طيبه يوت إتكرّف



    عارفاني المداين وكل وسايل إعلامه

    ماغرتني حاشه وماتبع هندامه

    ودالقمبرات الماعليهو ملامه

    ريفي وبفتخر نفسي وعذيذه مقامه



    لي آهلي التحيه سلام بلاد الطيبه

    لي دار المحنه آلي فؤادي حبيبه

    والمنشيه يامك لي نعيمه زريبه

    تسلم قمبراتنا المابكفي نصيبه



    ماعيب العدم قسم المعيشه الموله

    من غير القِرش عِزتنا اوله واوله

    نرضابه القليله وكت نقول لاحوله

    جاهل قمبراتنا قسم تقيفلوالدوله



    من غيرالقِرش قريتنا معلمه ناسه

    شبعانين كرامه علي العليها فراسه

    كم عوض الحسن حيّرعِقول الساسه

    والفارس سليم اسد البلد نبراسه



    ماشكرته داري عشان ازيدو مقامه

    إلا الشكره هيله وفي جبينه علامه

    وإن جانه الفقر حرّم مصيابو سلامه

    ماعيب العدم كيفن تسوي ملامه



    والدنيا..آن قست بي..تأدبٍ الحنكوشه

    من بعد السعد تسكن قسم في الكوشه

    ترجع للفقر تتعشه بي قرقوشه

    غداره العبوس إلاالنفس مغشوشه

    ......................................

    2

    هذه المرابيع رداً علي الرد الثاني للشاعر جعفر حسن العطا ود المادح

    من منطقة السويقيات

    مضمون رده يتلخص في نقاط كثيره يمكن حصرها في:

    ..السلام والشكر والتقدير والشوق والود

    ..امنية التلاقي

    ..اعلن انحيازه لجودة اجهزة الجيبي اكس والتخلي عن اب كدر

    ...تحدث عن فخر القبايل بالشعر

    ...تحدث عن مثل حلب الطيره كما قال

    (قولي ياملك دي طيرة شنو..آلحلابه خليت البقر فيهن بقيت تتغابه)

    ...كتابة رقم جواله بالمرابيع للتواصل وتحديد مكان للتلاقي



    فكان ردي عليه

    ويا جعفر سلام ياكا الرفيق الغالي

    فايض بالكرم شاعر قصيدك حالي

    ساكن في السماء وزي الشمس بتلالي

    مفخره للوطن واصلك مأصل وعالي



    ردك لي وِصل ياخزنة الجبخانه

    زاخر بالدرر ناقصلو بس فد خانه

    يتعرض آآتعل زي وصفه في الشفخانه

    بلسم للقلوب المن زمن عيانه



    شاعر وسامي قولك ونضمي آآبوفيكه

    والحبر إن بحر بكمل قبل يثنيكه

    في قول الشعر ما بنجبو البرميكه

    عنتره والملوح غرقو في شاطيكه



    قولك قبلو الله وقول رسول الأُمه

    من بعد الكِاتب وحديث محمد ثُمه

    قولك يالصم ماشفته زيو..نا ضمه

    إت شعرك علاج الفيهو شبت حمه



    والزايله..ن سِخت يامك قسم نتلاقه

    برضي مناي اشوفك وروحي زايده..آشواقه

    لي دارك قبيلتك وقريته وإشراقه

    غداره العبوس آلزايله هي الفراقه



    شُفتك في السماء القمر البضوي العتمه

    شُفتك نسمه لي ساعة تزيد الكتمه

    شُفتك قبل..آشوفك وشُف مكانك اسمه

    بي شُوف القلب والعين ملامح رسمه



    كم ملك القصيد إلتفه عقلك وحفْه

    لافَهمك كِمل لالحظه حِبرك جفْه

    مادام الشِعر طوعتو ليك إتقفْه

    زيك ياملك ليهو الخلق تنصفْه



    نرجع للدهب لي قبقبه واحوله

    مادام الخلق كترت عليها اقواله

    نفتح صفحته ونسرح نجر مواله

    لي خيرات ترابه وحوبته وامواله



    قبقبه يالّصمْ واجب كمان نرثيها

    وإتحظرت علينا وإلا مابنبكيها

    ارزاق البشر ماظن براها الفيها

    يارب العباد اخلفنا بي كم جيها



    جيت ومشيت رجعت علي الجهاز الجيبي

    مالك آآآلتعل قبل إتخذ تكزيبي

    ماقلت السليط إتماده في تعزيبي

    قرّيت آآملك ياهو البيطفي لهيبي



    ياحليل ابكدر طاطاطو زادت طاط

    وبرميجو..آتخرب واصبح دغِدل فطاط

    وحت ودالعطا الشكرك صِبح نطاط

    وبدّل لي عهودك وخلا فكرك جاط



    ويآلجيبي البُشاره الشكره جاتك تاني

    من جعفر اخوي المابتوفي..آوزني

    أقدل يالصم واوعك تقيف ورّاني

    نقب للدهب جيبي وبجيب الداني



    حنني اب كدر واصبح سقيم وميتْم

    إتمحن معزب وغِلو فيهو مكتْم

    آجعفر نسيتو هلاكو اضحي محتْم

    إتبكّهَ اب كدر واصبح طريد ومشتْم



    والاِم إكس تي..الجانه الجديد بشرنا

    كشاف الدهب جبناهو بيو خترنا

    امريكي الصُنُع كم للتبر خبرنا

    زي الجيبي واحد وفي الدهب عترنا



    ماشكرتو ساهي وبس عِرف مقدارو

    الام اكس تي السامي الثمينه اسعارو

    زايد تقنيه واصلي وسمح مِعيارو

    فات الجيبي زايد في بُعد مِعبارو



    ضرب العشره في الخمسه ومقاس البوصه

    زيد إتنين ونص ابعد مسافه بغوصه

    فات الجيبي زاتو وبي خُطط مدروسه

    ده آياهو الجديد البِمرُق الناموسه



    فُخيّر القبايل بالشعر موروث

    ومن زمن الرسول آآمك قسم ملموس

    وفُخيّر القابيل في آلكُتب مدروس

    ودار اولاد جعل تاريخه مامدسوس



    ومن حقي..آفتخر بي قريتي وبي ناسه

    تسلمي قمبراتنا الدره إنتي..آلماسه

    والخلاني..آمدحه المابرضه زِِلت راسه

    هي الصندل تعطر لي عدوها وفاسه



    نحنا بلا دليل ماظن بتجدي تفيد

    انحنا قليله فينا شحيحه يا الصنديد

    ونحنا مع الدليل القافيه لو بتجيد

    انحنا وتاني نحنا ونحنا للتأكيد



    وغنه المك سراج ابدع اجادو مديحه

    يازينة قُرانه وكلمه فيها صحيحه

    إن بحر القوافي علي بِلادي شحيحه

    قرية بلافخُر يامك حقيقه جريحه



    سُواتانا موضحه وبانت شمس منكشفه

    قريتنا المعلّيه للقيم مُرتشفه

    تخطيطه ومدارس وميذنه ومستشفه

    وإن شافه المنغجل من محاسنه يشفه



    في بلدي الشتاء متل آلكِنو الصيف

    وابوابه المفتحه بي الكرم للضيف

    وفي الشبل البلاوي الموجو هدّ القيف

    وفي يوم الشدايد عينو جمره وسيف



    وحلب الطيره زاته علينا تب مي خايله

    واللقا والعدم واحد علي ها المايله

    الخلانا نِتلفْح هجير القايله

    عندنا راي وشوره علي بواقي الزايله



    وحلب الطيره زاتو علي نفسنا قليل

    وحلب الطيره لو مطلب بشوفو زليل

    الدنيا العبوس الديمه لينا تميل

    ساكانا الممحّقه بي حوافر الخيل



    وماوريت سُواتنا عشان اقول سوينا

    إلا حقيقه فينا كما الشمس ضوينا

    تسلم قمبراتنا..المابطيق انا بينا

    لافقدت قِيَم لاناسه سوّت شينا



    بت القمبرات اوصافي مابتقيسه

    مامرقت مبرّجه توبه ساتر ديسه

    العِفه العليها اوصافي مابتقيسه

    عِفته في البتول اُم المصدق عيسى



    والحنكوشه زاته قسم ببدل سَيره

    برجع للأصل جرتِق ضريره وسيره

    لي بت البلد وانا مابشكّر غيره

    ترضابه القليله وربي كتّر خيره



    في رص الرقم يامك قسم ابدعته

    دقيت الرقم مقفول وتاني رجعته

    بدرالسبعتين الضوه دارو سطعته

    بي الرد الرصين انا لي مسامعي..امتعته



    والكايسني بي يلقاني صوت بي صوره

    في مُشغِّل وسايطو معنونه ومزكوره

    في النوكيا المحدث آآآياتعل منشوره

    ارقام الشريحه وفي يمينه الصوره



    شاغلنا الدهب خشّت نفِسنا العاله

    اماره النفس والدنيا هي البطاله

    آآتعل الارض كشفت خلاص اثقاله

    قرّبت القيامه الساعه يوم اهواله



    ها المربوع كتبتو وياخلق بكاني

    وإتزكرته يوماً مُر علي وجداني

    يارب العِباد الدُنيا طيّبه فاني

    اسكنا الجنان الطِيبه دايم وداني

    ...................................

    3

    هذه المرابيع رداً علي الرد الثالث والاخير للشاعر جعفر حسن العطا ود المادح

    من منطقة السويقيات

    مضمون رده يتلخص في نقاط كثيره يمكن حصرها في:

    ..السلام والشكر والتقدير

    ...المدح

    ...حظر منطقة تنقيب الذهب قبقبه

    ...عدم نفع اجهزة التنقيب كما قال (النموصه ونشربه)

    ...مثل حلب الطيره كما قال:

    (لبن الطيور خليتو ليه مانحنه صدقناهو تب)

    (قول ليا هل جففتو يوم سويتو يامك في عِلب)

    ...فخر وشُكر الولايه من شندي لي عند اب حمد



    وهذه المرابيع كتبتها رداً علي رده بعد ان إلتقينا لأول مره

    في سوق جمارك العبيديه



    ختْرنا الدُغش كان المراد إنتمّه

    قاصدين الجمارك وفي دياره اللمّه

    رافقني الهميم الحاشه مابتزمّه

    ودالمك كمال الغالي ودالعمّه



    بكسي الخط وِصل وقّف نقرلو آلبوري

    وإتلاقينا شُلّه نزلنا في المنصوري

    كفتريا الجمارك وفيها خِلِي ونوري

    ياعوض الكريم إسعد صباحك جوري



    لاقيت الاصيل اللي رِويحتِي خليله

    جعفر ودحسن تاج القوافي دليله

    فارس ود جعل ماشفتو سوى رزيله

    حرّم في الكرم يضبح يكفي قبيله



    جات اهل البلد هيبه وسلام ومحنّه

    اهلي الماعليهُن لاملام ومظنّه

    ونسه وقرقراب ومع البسط جبْنّه

    يارب العِباد اجمعنا فوق الجنّه



    جدّعنا النضم فوق الشعر واوزانو

    دوبيتو وغناهو وهيبتو والوانو

    فصحه ودارجيه وفي جميع اركانو

    قعّدنا النضم خوجلنا في ميزانو



    جات ساعة الفطور ومرقنا شُله وتيّم

    ولي مطعم عوض مرحب سلام تعظيّم

    كرماً في اب شنب فِطره وحقيقه مقيّم

    وها البادرابي حالِف مايشيل مِليّم



    مرقنا علي الدرب والقايله في الهادباب

    سلام اهل العلم مرحب دياره حباب

    ودشيخ البلد هيبة وعظيم انساب

    وفارس في الكرم نيلاً طمح تساب



    مجاهد ومعتصم في منزلُن قيّلنه

    ونسه وقراقرب وعلي الشعر ميّلنه

    مرحب بي الامين اللعزر شيّلنه

    شاعر وفي الغزل وافرعبِر كيّلنه



    لي جعفر سرد ردو الاخير انعشنا

    بي قِيمُو النبيله رمى آلعقول ارعشنا

    يا الردك ينغجل في القلب هبشنا

    يشهد لك محمد خلك إت وادهشنا



    فتْحنا الدروب البي الشعر مخبوره

    قبقبه أُم كِنُوز البي الدهب مشهوره

    هاالصبحت مقفّله للخق محظوره

    في غيره الرزق ماعِدمت المعموره



    واسباب الرزق يامك كتيره عديده

    بديك المثل بي جُمله مِني فريده

    هالجيبي آن حضر زمن العنج بي فيده

    كان آآآمك وحاتك مابخلو حديده



    ماغِسنا اب كدر بي شترتو..وواجِعنا

    لاجاب الدهب ساكِت مَغَس فاجِعنا

    شُف دهابا تنعلو نقِْب آآلحارِجنا

    كورِك فِك رِويحتك وفكنا وخارِجنا



    والطبق المدور حرفتو الفوقاوي

    والدهب التِحت راقد قسم مُوخاوي

    في الطبق المتل قمر الفايفي الضاوي

    ده اياهو الاصيل السَمَوَ بي البيضاوي



    مُوص إنت اب كدر بدرلو بي إعدامو

    كم عزّب خلايق بي المواجع نامو

    والجيبي الاصيل المافي زولاً لامو

    هاك اسمع رنينو وإنتعاش انغامو

    :::::::::::::

    كُل ماسِدلِي طاقه علي بتفتح طاقه

    حت بت البلد مدحك جحد ما طاقه

    مُو عيب الفخر بي عفته واخلاقه

    إرعها الإله إحفظ قيم خفّاقه



    يابت البلد شُكْرِك مبادي وعاده

    موروث مِن زمن ريا وقديم اجداده

    شُكْرِك ماهُو عِيب انا فِيهو يوت إتماده

    زينه وفنجريه وللقيم مشهاده



    ولو لبن الطِيور انا حاشه ماخلّيتو

    عقلك في مثل ياخلي إت شلّيتو

    مو لُغزاً يحيّر وبالشعرحلّيتو

    ماسك في آلمثل بي فد درب علّيتو



    وما اتقلب الزمن ياهو الزمن ياخِينه

    وإن ضاق الفهم ربي القوافي يعِينه

    و الشعر إن نقص ياخلي لو فدجِينه

    ببقه ركيك وهَش ماظنو يبقي رتِينه



    في الشعر المُبالغه والحِكم مطلوبه

    يا الغلبك تفِك سِر ضَرعها المحلوبه

    ماتصبح فِكِرْتك للمثَل مقلوبه

    والمثِل آملك ماببقي يوم إلعوبه



    فخرنا بي الشعر فِطره وطباع وطبيعه

    مِن خلقو البشر شيتاً جُوانا زريعه

    ماشاخت حروفو نضيره زاهى ربيعه

    مُو شِيماً جديده ولا دخيل وصنيعه



    نفخر بي الوِلايه وعِزها وسُلطانه

    داري..نا ياها دارك والقيم عِنوانه

    ريدك ياوطن فينا وسكن جُوانه

    وإن قلت التحزّب انحنا مُو جُوانه



    ووصفي انا بي القصيد آآخلي مابتنه

    بِرهِق للحِروف وبمحِنه وتتعنه

    تشابي القصايد ولي تجي وتتغنه

    وإن قلت الشعرحيرتو لامن جنه



    وقفتَ الردود وختمتها وهديته

    كُت راجي الكتير إتمنه لو مديته

    شديت الحروف انا للغزل وديته

    مادام املك بي حلفك إت سديته



    وانهيت المُساجله وإنتهت وِدّيه

    مرّت زي نِسيمه ونتفِق سِلميه

    إن وِصلن رِدودي تلاته فوقِن ميه

    ماظن نختلف ربك عِلِم بالنيه



    لمتنا الظروف بي حضرتك لاقتنا

    ساعات الزمن بي فُرقتك عاقتنا

    آبقول الوداع إن قررت طاقتنا

    بي نِتلاقه فيها ان ماقِست ساقتنا



    يارب العباد استٍُرنا في الغداره

    من تيهه وضلاله ومِن شِروره وناره

    الدُنيا العَبوس اكفينا يوت اشراره

    دخلنا الجِنان الفي الكِتاب اسراره

    .................................



    مُساجلات اخرى

    4

    هذه المرابيع رداً علي رد

    الاستاذ:سراج الدين ابوعاشه من منطقة الباوقه

    ازكر مضمون رده في نقاط

    ...تدخل مابيني وبين ودالمادح

    ...وصف نفٍسه بالرجل الذي سيتحداني بشاعريته

    ...وان يتنحى ودالمادح عن مساجلاته معى بوصف تقليل ردود ودالمادح

    ...تحث عن حبي للقمبرات ومقولة

    حلب الطيره في ردي الاول علي رد ودالمادح

    ...وقال إنتو ماناس دهب انتو ناس توم وشمار

    ...والبكسي ليكن مابقيف كيفن تقيف الدوله

    (نقطه اخذها من ردي الاول علي رد ودالمادح الاول)

    ...وقال لي خلي شكير الاجهذه وشكر ربك

    وصلي علي نبيك واكتب قصايدك فيهو

    ...واوعه تغرك الدنيا والمال وتتبع ابليس

    ...واعلن عن جاهزيته للردود،

    ...إفتخر بنفسه وقبيلته وهو من حق اي شخصٍ كان شاعر او غير شاعر



    فكان ردي عليه

    مدخل: يجب علي الشاعر التريّس في إختيار المفرده

    حتي تكون مقبوله للمستمع فالكلمه

    كالهسم إذا اطلقتها لن ترد

    سوا كانت

    مدح

    او

    وزم

    وليس كل مايلمع زهباً

    .........................

    سلام آآموطن الشُعراء الكِرام وعُزاز

    ويا الاحيّتو عصراً إشتهربُو عُكاظ

    وماها غريبه فيكم وشيمة الافزاز

    ونهر النيل وناسه هي للقوافي ملاذ



    والكايسلو نار انا ياخي ماظِن..اردلو

    باباً جابلو ريح انا من جِهاتي بسِدلو

    والبنعتني بنشِدو لي طريقو بعدلو

    بي مغسة و سُكات انا سهاي ياخي بكُتلو



    ودالمادح النحيتو مابتنحه

    لافهمو..آتعدم لاجفه شعرو وشحه

    ليك مني القصيد القلتو فيهو وصحه

    إن زحو الجبل ماظنو يوم إتزحه



    وإن قُلت الشعر نِعمه وتُراث وسُلاله

    فِكره وموهبه وعلماً رفيع واصاله

    والشعر آآآسراج القمره ليهو الهاله

    ماقمة تحدي ولانِزال ورجاله



    بدر السبعتين الهلاّ زيدلو تمانيه

    وابقى صغير عمر إلا المقاصد تانيه

    والناس بالعقل يمكن وليد الثانيه

    افضل من كبيراً قبلو في هالفانيه



    والشاعر الكبير آآبقول كلاماً إجْرح

    آآبطلق سِهامو وبي تِهِترو إفْرح

    العمر آبهم بجمع خلايق وإطْرح

    الشاعر الكبير القولو إهدي وإشْرح



    حلب الطيره طلسم للمناله صعيبه

    واجب اوضحا الصبحت عليكَ غريبه

    وإن ضاق الفهم ياني البديهتو رحيبه

    يعني المستحيله بنطلبه وبنجيبه



    صاح ما ناس دهب لاكِن عِرفنا طريقو

    فلاحين انحنا وفي البيبني فريقو

    معدنا النفيس المابهته بريقو

    زايد نور وعِذه ولينا هادي رحيقو



    والتوم والشمار المُستحيل إتعابو

    وإن بِقن الملامه عِتابه بي نرضابو

    هو الزول إن عِلا وقفلو الفقُر مِن بابو

    مابنسى الاصِل ماظِن ينُكر آنسابو



    ود ريف آآسراج وزرعنا توم وشمار

    وياهن دخْلنا وزادن بلدنا نضار

    وماعيب الزِراعه وحرفته وتزكار

    وكم علّت قُري وزادت شِموخ وعمار



    وعِد من اب حمد لي عِن مشارف شندي

    مصدرُن الزِراعه وَرَاضي خَصبه بِتندي

    توم وشمار وماعِزْ وكسبره وبرمندي

    مافيهن ملامه وياني صاين بندي



    ياما الدوله وقفت لي بلدنا وناسه

    ماساكت بقول انا نضمي دارسو دِراسه

    اسأل منها الجابت كِبار الساسه

    يوم فتحو المدارس ومَشفى لي حُراسه



    قُول لي ياسراج البُكسي كيفِن إقيف

    وهو الاصلاً جماد الماعليو تكليف

    وراكبو بِِوقْْفو وبمشيبو بي توظيف

    واخطيت آآآسراج اجحفته في التوصيف



    وكُل مايجرحونا بنهدي نحنا الطِيب

    وصدرنا للعوازل كم وسيع ورحِيب

    وطيبه علي العلينا منارة التهزِيب

    ولي بلدي السّلام الجرحِي بيها بطيب



    والخلق الدهب خلق السبب لي جيبو

    ربنا سخرو وَرّانا لي نقيبو

    قابيل الكَتل ورّوهو سُترت عيبو

    والتِحت الارِض ربك بيعلم غيبو



    شُكر المولى خالقنا ونبينا رسولو

    مامُتغابِي عنّو..آشعاري مابتطولو

    اكبر من قصيدي وشِعري قاسي يقولو

    بشكُرو في صلاتي وفي تجلي نِزولو



    مابتوريني شُكرو ولاني زولاً جاحِد

    الله البي بيعلمو هو البيدي آلشاحِد

    آآرب العباد إنت الإله الواحِد

    اعلم بي النفس من عبدك الي ضاحِد



    آآسراج مابغرّني لاقصيد ومباني

    لاشيطان تِبعتو ولاضلال اغاواني

    إن قلت الفقر مرحب حبابو..ن..جاني

    بس غَنيان مكارم وطيبه ما لي تاني



    ردّك ماني دايرو لو القصيد إختله

    ردّك ماني دايرو لو الكلام إعتله

    لوردّك محكّمَ وللنفوس إحتله

    بقبل بيهو ردك وسيفي ليك إستله



    صوت القمبرات الديمهٍ عالي مقامه

    صوت القمبرات الماعليها ملامه

    صوت القمبرات الريده فيني علامه

    صوت القمبرات الفيني صحه كلامه

    ................................

    5

    رد علي رد مجموعة من الشعراء الذين انتقضو كلمة إن قفه مابتجاره

    في مرابيع قبقبه الاولى

    فمعظمهم كان نقدهم غير بناء

    ومنهم الشاعر خلف الله عوض من ابناء نهر عطبره

    يتلخص رده في نقاط:

    ..النقد الكامل لكلمة إن قفه مابتجاره

    ..وليس لدي سلطة في التحكم بالشعر والقوافي



    فكان ردي عليهم

    إضاءه

    سأتحدث قبل ان اسرد بعضٍ من المسادير

    عن الكلمة التي وردت في مسدار قبقبه الاول إن قفه مابتجاره..

    انا لم اقصد بها تحدي الشعراء إنما القصد منها التفرّد في طرح المناسبه

    فإذا كتب شاعرٌ نص ما.ورد عليه شاعرً اخر.علي نفس النص المطروح

    لن يكون سوى نسخةُ من الشاعر الاول

    فهو لم ولن يضيف إلي النص اي من الجماليات الشعريه.

    فإن إتساع المخيله من اهم مميزات الشاعر الفذ والمستمع الجيد للشعر

    وحصرها في إطار واحد تدل علي عدم ثقافته وجهله بالمفرده..

    فالشعر لايمكن ان يكتسب بالقوه

    إنما هو موهبة من الله سبحانه وتعالي.

    فالشاعر هو لسان قبيلته التي تفتخر به ويفتخر بها

    فالذلك يجب عليه التفرد والتميذ في طرح قصائده

    من حيث الكلمه والمعني والإلقاء

    والبحث عن ماوراء المفرده المعتاده ودمتم سالمين.؟.؟





    وقلت..آنا ود سراج إن قفه مابتجاره

    في الزول الفِهِم في الشافه قوه وغاره

    يا الشعراء الكِرام المابِفِك اسراره

    ماظنيتو قفه وماعرف مقداره



    وصْاني الكبير المك سراج الغالي

    اوعك تبقي صوره ولي تهد امالي

    ما تقوليّ فِلان القدوه لي قُبالي

    شِق دربك براك اَصَلْ البعيد العالي



    ما سماني ساهي علي نزار قباني

    فرّق بي الإسم بي حِنكتي واوزاني

    شقيت الدرِب وضحته لي عنواني

    ود المك سراج الشاعر السوداني



    والخلاني اكتب في حروفي مقوله

    إن درت الثريا..آنا بي مِدادي بَطوله

    راكب في الهملّعه في آلصِفوف الاوله

    واثق منها وبي كل شجاعه بقوله



    ياني..نا ود سراج فارس القصيد والنمه



    وإن طالني العزول والله مابهتــــــــــــمّه



    سامي وود فحول اقسم اعــــــــــــادل اُمه



    شاعر ود ملوك بربر بلاد الهِـــــــــــمّه



    مدلول الحديث مابقول كلاماً فــــــاضي



    وإن دُرتو الحُـكُم ياني المُدان والقــاضي



    محكمة الشِعِر ساحل فحول المـــــــاضي



    والنظم الحديث لولاي مؤكد صــــــــادي



    من زادي الوفا وبكرم ضيوفي وجاري



    صنديداً وأسد ماخُفته غير البـــــــــاري



    سامي كما النجم في الليل دليل السّـاري



    واغلا من الدُرر والماس مِداد اشعــاري



    والخلاني ابدع في الشعر والقافيه

    ورارثو وِراثه ماسطوه وتهور مافيه

    دارج وفُصحى مُتوشّح ثقافتو وكافيه

    والصنّاجه تشهد وليا لبْت حافيه



    والزول البِشق درِب اوعه مِن تمشيهو

    تصبِح نُسخه مِنو وما اظن ترميهو

    ماتجاروها قبقبه قولي مابواسيهو

    اكتبو في (آب قمر)باقي الخلا و واديهو



    قبلنا سيدنا مُوسي الحِكمه عندو عصاتو

    فجّابه البحر خالِقنا رادلو نجاتو

    والباروهو هِلكو وصِبحو عِبره وماتو

    راح فرعون وجندو ضحيه لمباراتو



    والنضم المحكْم شِلته فيهو جداره

    شاعر وبفتخر نفسي وعِرفْ مقداره

    داري القمبرات انا لي شموخ ومناره

    مُستشفى ومدارس وإذدهار وحضاره



    شن فايدت قصيدي بلا الفخُر والعِزّه

    والعارف مقامو حقيقه مابِِهتزّه

    والخلاني اقدل في البلد وإعِتزّه

    عِرض اُماتي ثابت ومن عيوب إتنزّه



    حِرُوف القافيه عندي عليها سُلطه..وداره

    ماتحديت مُكابِر أجدْتَ لى مِسداره

    مادام الإله اداني مِن مِعباره

    قادر اطوعه ولجمْ بنات افكاره



    يابخت العِرِف عِزو وماقمو وقدرُو

    والقمر إن افل باكر ببين بدرُو

    ما بِسطع محلو نجم يعقبو يغدرُو

    تاني المافِهِم بجهل كلامو بعذرُو

    .............................



    تمت بحمد الله ولكم مني خالص الشكر والتقدير

    avatar
    ايمن عوض اللة ود القمبرات

    عدد المساهمات : 3
    تاريخ التسجيل : 04/09/2010
    العمر : 27

    رد: مساجلات قبقبه

    مُساهمة من طرف ايمن عوض اللة ود القمبرات في الخميس نوفمبر 03, 2011 12:27 pm

    الي الامام يا حسام (القمبرات المسلول)

      الوقت/التاريخ الآن هو الجمعة أكتوبر 20, 2017 7:04 pm